Kjúklingabringa „Parmegiana“, steikt í brauðhjúp, með tómat og mozzarella


 

 

Fyrir 4

SÓSA

½ dl Extra Virgin ólífuolía

1 stk. laukur, fínt saxaður

3 stk. hvítlauksrif, fínt söxuð

400 g góðir tómatar í dós, „crushed“

1 lárviðarlauf

1 lítil rósmaríngrein

½ tsk. chiliflögur (smekksatriði)

Salt og pipar

Aðferð:

Svitið lauk og hvítlauk í ólífuolíu í 2-3 mín. í potti við meðalhita. Bætið við tómötum, lárviðarlaufi, rósmarín og chiliflögum. Sjóðið við vægan hita í 30 mín., smakkið til með salti og pipar. Fjarlægið rósmaríngrein og lárviðarlauf. Blandið með töfrasprota í nokkrar sekúndur til að fá fínni áferð. Sósan á að vera frekar þykk.

 

 

KJÚKLINGABRINGA

4 stk. kjúklingabringur, 150 g hver

200 g hveiti

2 egg + dass af mjólk

400 g Panko brauðraspur

50 g parmesan ostur, rifinn

Salt og pipar

2 kúlur mozzarella, skornar í 6 sneiðar hvor

Rifinn parmesan ostur

Ólífuolía til steikingar

250-350 g spaghettí

½ búnt flöt steinselja

Aðferð:

Skerið með beittum hníf þversum og langsum í kjúklingabringurnar og fletjið út þannig þær þynnist og verði tvöfaldar um sig. Sláið létt á þær með buffhamri til að jafna þykktina sem á að vera 1,5-2 cm. Kryddið létt á báðum hliðum með salti og pipar.

Blandið saman brauðraspi og parmesan osti. Þeytið saman egg og mjólk. Pannerið kjúklinginn með því að dýfa fyrst í hveiti og þekja báðar hliðar, sláið aðeins af hveitið, og setjið yfir í eggjablönduna, þannig að hjúpi vel. Setjið að lokum í raspblönduna og þrýstið raspinum vel á kjúklinginn á báðar hliðar. Þetta er hægt að undirbúa stuttu fyrir matreiðslu. Geymið í kæli þar til matreitt.

Hitið 2 stórar pönnur og hellið um ½ dl af ólífuolíu á hvora um sig. Setjið kjúklinginn í snarkandi heita olíuna. Steikið bringurnar á báðum hliðum þar til gullinbrúnar (u.þ.b. 2 mín. á hlið). Færið af pönnunni og þerrið á pappír. Setjið kjúklingabringur í eldfast mót, 2-3 msk. af sósunni eru settar í miðjuna ofan á hverja bringu og 3 sneiðum af mozzarella raðað ofan á ásamt 1-2 msk. af rifnum parmesan. Bakið í 170°C heitum ofni í 5-6 mín.

Berið fram á diski með spaghettí. Gott er að nota dálítið af sósunni og blanda saman við spaghettíið ásamt saxaðri ferskri steinselju og Extra Virgin ólífuolíu. Einnig gott að bera fram með spergilkáli.

 

Uppskriftin kemur frá veitingastaðnum Essensia.