Sleppa valmynd og fara beint í meginmál

Hægelduð bleikja með sellerírótarmauki
og fersku mangósalsa

Þessi réttur er frá:
Sushi samba

  • Bleikja án roðs 1stk.
  • Lime 1 stk. 
  • Sykur 90 g                                                        
  • Salt 70 g

Aðferð
Blandið sykri og salti saman ásamt rifnum limeberkinum. Þekjið bleikjuna með blöndunni og látið liggja í 12 mínútur. Skolið bleikjuna svo vel og þerrið vel á eftir. Bræðið smjör þangað til að karamelluáferð er komin á það. Penslið bleikjuna með smjörinu og setjið inn í ofn á 90°C í 5 mínútur.


Sellerírótarmauk

  • Sellerírót 1 stk. 
  • Mjólk 200 ml
  • Smjör 50 gr
  • Rjómaostur 50 g
  • Salt og pipar

Aðferð
Afhýðið sellerírótina og skerið í fína kubba. Setjið sellerírótina í pott ásamt mjólkinni og smjörinu. Hitið rólega upp að suðu og sjóðið þangað til sellerírótin er orðin silkimjúk. Setjið allt í blandara ásamt rjómaostinum og blandið vel, hér má bæta meiri mjólk og/eða smjöri við til að fá silkimjúka áferð. Smakkið til með salti og pipar.

 
Mangósalsa

  • Mangó 1 stk.
  • Gúrka 1 stk.
  • Dill 1/2 búnt
  • Lime 1 stk.


Aðferð
Afhýðið mangó og skerið í fína teninga. Skiljið kjarnann úr gúrkunni og skerið gúrkuna í fína teninga. Fínsaxið dill og blandið öllu saman ásamt lime safanum.

Samsetning
Setjið sellerímaukið á diskinn, leggið bleikjuna ofan á og toppið með mangósalsa.

 

Þessi uppskrift var sett inn í tilefni rósavínsþema í Vínbúðunum. Rétturinn hentar vel með ósætu rósavíni. Einnig er hægt að finna sína eigin samsetningu í vöruleitinni.

 

Uppskriftin er frá Sushi samba