Sleppa valmynd og fara beint í meginmál

California rúlla með trufflumajónesi

Þessi réttur er frá:
Sushi samba
?

Humarsalat

  • Humar 500 g
  • Japanskt majónes ½ peli                                            
  • Kóríander ½ búnt                                                  
  • Lime 1 stk.  
  • Jalapeno 1 lítið stk.
  • Salt og pipar    

Aðferð:
Skelflettið og hreinsið humarinn vel. Leggið hann á bakka með smjörpappír og kryddið með salti og pipar og eldið í 5-6 mínútur á 140° C í ofni.
Kælið humarinn þvínæst og saxið niður. Fínsaxið kóríander ásamt jalapeno (takið fræin úr). Blandið öllu saman með majónesinu í skál, bætið rifnum berki af einu lime saman við og smakkið til með salti og pipar. 


Trufflumajónes

  • Japanskt majónes ½  peli
  • Sítróna 1 stk.
  • Sojasósa 50 ml
  • Sykur 1 tsk. 
  • 1-2 dropar truffluolía

Aðferð
Blandið öllu vel saman í skál. 
 

Sushi grjón

Mikilvægt er að velja réttu hrísgrjónin og er hægt að kaupa sushi hrísgrjón í nánast hvaða matvöruverslun sem er.
Skolun á grjónunum er mjög mikilvægt verkferli og felst það í að þrífa grjónin án þess að brjóta þau. Setjið grjónin í djúpt ílát og látið það undir kalt kranavatn þar til vatnið nær vel yfir grjónin. Hrærið varlega í grjónunum með höndunum þar til vatnið helst alveg tært.

 

  • 22 dl grjón
  • 2  l vatn

Sjóðið hrísgrjónin í hrísgrjónapotti í 45 mínútur, leifið þeim að hvíla í pottinum í 20 mínútur og takið þau svo varlega úr með sleikju og setjið í viðardall (hægt er að nota plast líka).

Samsetning

  • Hrísgrjóna edik 
  • Noriblöð
  • Avókadó
  • Rautt masago

Hellið 7 dl af edikinu yfir hrísgrjónin og blandið varlega saman. Dreifið hrísgrjónum á noriblað sem er skorið í helming. Snúið blaðinu við svo grjónin snúi niður á skurðabrettið og leggið þunnt skorið avókadó eftir endilöngu noriblaðinu. Dreifið humarsalatinu þar yfir. Rúllið varlega upp með makimottu.  Skerið í 8 jafna bita. Raðið rúllunni að vild á disk. Setjið trufflumajónes yfir og skreytið með rauðu masagoi.

 

Þessi uppskrift var sett inn í tilefni rósavínsþema í Vínbúðunum. Rétturinn hentar vel með ósætu rósavíni. Einnig er hægt að finna sína eigin samsetningu í vöruleitinni.

 

Uppskriftin er frá Sushi samba