Vínbúðirnar hafa nú í mörg ár verið þátttakendur í Grænum skrefum í Ríkisrekstri, en í maí 2018 voru allar starfsstöðvar komnar með öll fimm skrefin. Græn skref eru leið fyrir opinbera aðila til að vinna markvisst að umhverfismálum eftir skýrum gátlistum og fá viðurkenningu eftir hvert skref. Vínbúðirnar vinna einnig eftir virkri umhverfis- og loftlagsstefnu þar sem lögð er áhersla á að tryggja góða frammistöðu í umhverfismálum. 

Nýverið fór fram lokaúttekt á Grænu skrefunum í nýjustu Vínbúðinni, Vínbúðinni við Mývatn, og er hún því komin með öll  fimm Grænu skrefin eins og aðrar starfsstöðvar Vínbúðanna. Gaman er að segja frá því að enginn blandaður úrgangur kemur frá starfsemi Vínbúðarinnar við Mývatn, allt fer í endurvinnslu eða endurnýtingu. Lífræni úrgangurinn er nýttur sem fóður fyrir hænur á svæðinu eða fer í safnhaug, svo hægt er að segja að um sé að ræða frábæra sjálfbærnihugsun og fullkomna hringrás.