Hitabylgjur sumarsins í Evrópu hafa vafalaust  ekki farið framhjá neinum. Fyrir vínræktendur er það ekki bara hitinn sem getur reynst erfiður fyrir vínviðinn, heldur einnig þurrkarnir og vatnsskorturinn sem honum fylgir. Vínviðurinn er nokkuð harðger planta og þolir ágætlega þurrka miðað við aðrar landbúnaðarplöntur, en á þó sín takmörk. Langvarandi hiti og þurrkur getur valdið því að plantan hætti að starfa og leggist í dvala, eða jafnvel deyi. Uppskerumagn reynist einnig minna þar sem minni vökvi fer í berin sjálf.  

Uppskerutíminn 

Víða er uppskerutímabilið hafið og hefur byrjun þess færst stöðugt framar síðastliðin ár. Það er margt sem þarf að huga að í þroska berjanna áður en þau eru tínd og því er ekki alltaf ákjósanlegt að einfaldlega tína fyrr. Með reynslu og þekkingu í bakpokanum hafa vínframleiðendur tekist á við náttúruöflin svo við getum bragðað á vínum sem sveiflast ekki eins öfgakennt með veðurbreytingum eins og þau gerðu á áratugum áður. Þannig er öll vinna í víngarðinum orðin mikilvæg svo vinnan í víngerðinni verði markvissari og skili sér í gæðum vínsins sem endar í glasinu hjá okkur.  

Við uppskeru þarf framleiðandinn meðal annars að taka tillit til sykurmagns og sýrustigs í berinu, en einnig hversu þroskað hýðið er. Þroski hýðisins er nefnilega mikilvægt fyrir bragðþrótt vínanna, sem og tannín byggingu. Það að berin þroskist hratt er því ekki endilega alltaf betra. Með því að skapa skugga fyrir berin og skýla þeim þannig fyrir mikilli sól hægist á þroska berjanna. Hvernig vínviðurinn er klipptur og hengdur upp getur líka skipt máli. Þá er ekki síður mikilvægt að fylgjast með stöðu vatns í jarðveginum og bregðast við vatnsskorti með viðeigandi leiðum, þar sem þær eru leyfilegar.   

Skógareldar 

Hiti og þurrkur er ekki það eina sem vínræktendur hafa þurft að kljást við því víðsvegar í Frakklandi, Spáni og Grikklandi hafa einnig geisað skógareldar. Í Bordeaux virtust skógareldarnir hafa meiri áhrif á skóglendi en víngarða, en þó er alltaf hætta á því að reykurinn skili sér í bragðeinkenni rauðvína. Mesti skaðinn af skógareldunum er þau áhrif sem þeir hafa haft á fólkið sem vinnur við víngerð og vinnuaðstæður þeirra. 

Það eru mýmargar áskoranir sem víngerðarfólk stendur frammi fyrir á ári hverju og 2026 var engin undantekning á því. Einhverjar tegundir af 2026 árgangi frá norðurhveli jarðar munum við svo líklegast ekki sjá í hillum Vínbúðanna fyrr en eftir jól og enn aðrar ekki fyrr en eftir fleiri mánuði og ár.

Berglind Helgadóttir DipWSET
Vínsérfræðingur