1. Skerið ávextina og setjið í könnuna.  Takið kjarnann úr eplinu og skerið eplið í þunna báta, jarðarberin til helminga og appelsínuna í þunnar sneiðar.
2. Gott er að þrýsta létt á ávextina með sleif eða skeið til að leysa örlítinn safa úr appelsínunni og jarðarberjunum. Passið að ýta ekki of fast þannig að ávextirnir verði ekki að mauki.  
3. Hellið í könnuna hvítvíni, brandí, appelsínulíkjör (t.d. Triple sec) og límónusafa. Hrærið varlega saman.  
4. Lokið könnunni (t.d. með filmu) og setjið í ísskáp í a.m.k. 2 til 4 klukkustundir til að kæla og marinera ávextina í blöndunni. 
5. Setjið sódavatn og klaka í könnuna rétt áður en sangrían er borin fram.

Ef þú vilt að fólk geti valið sjálft hversu sæt sangrían á að vera er hægt að sleppa því að setja sódavatnið í könnuna. Hver og einn getur þá fyllt ¾ af glasinu með sangríu og valið svo um að fylla upp með sódavatni eða, fyrir þá sem vilja hafa drykkinn sætari, með Sprite, engiferöli eða skvettu af sykursírópi.