Lambakóróna með döðlusultu, jógúrti og hnetumulningi

Grillmarkaðurinn

Fyrir 4

  • 1,2 kg lambakóróna
  • 8 msk. grófkorna sinnep
  • 6 msk. hunang
  • Salt og pipar

Snyrtið lambakórónuna og skerið í fituna. Kryddið kjötið með salti og pipar. Blandið saman sinnepi og hunangi. Penslið kjötið með gljáanum. Grillið kjötið á miðlungsheitu grilli með fituhliðina niður í 6-8 mínútur en passið vel að það brenni ekki. Færið kjötið reglulega því fitan brennur auðveldlega og munið að pensla það. Snúið svo kjötinu við og grillið áfram í 6 mínútur. Leyfið kjötinu síðan að hvíla vel áður en það er skorið. 

Skerið kjötið á milli beinanna og dýfið því í döðlusultuna, jógúrtsósuna, hnetumulninginn og njótið.

 

DÖÐLUSULTA

  • 2 skalottlaukar, fínt skornir
  • 2 hvítlauksrif, fínt skorin
  • 250 g döðlur
  • 50 g sykur
  • 400 ml vatn

Steikið laukana í potti upp úr olíu í smá stund. Bætið döðlum og sykri út í ásamt vatninu. Sjóðið við vægan hita þar til döðlurnar eru orðnar að mauki og maukið svo vel þar til þetta verður eins og sulta. Kælið. 

JÓGÚRTSÓSA

  • 200 g hreint jógúrt
  • 2 hvítlauksrif
  • Safi úr ½ sítrónu ásamt berkinum

Blandið öllu saman í skál.


HNETUMULNINGUR

  • 200 g kasjúhnetur
  • 200 g salthnetur
  • 1 msk. karrí
  • 1 msk. paprika
  • 1 tsk. kúmenfræ
  • Sesamfræ 

Ristið hneturnar á pönnu við vægan hita. Setjið svo í matvinnsluvél ásamt kryddinu og maukið

Þessi uppskrift er frá Grillmarkaðnum

 

VÍN SEM HENTAR
Sætan í döðlusultunni kallar á rauðvín frá heitum svæðum eins og SuðurFrakklandi, Puglia og Sikiley eða frá heitu svæðum nýja heimsins eins og Kaliforníu, Chile, Suður-Afríku eða Suður-Ástralíu. Fyrir þau sem þykja hnetur góðar getur verið spennandi kostur að prófa kraftmikið og eikað Chardonnay með þessum rétti.

 

 

Lamb og vín