Risotto og steikt hörpuskel með grænertum, grænkáli og myntu Salsa Verde


Risotto og steikt hörpuskel með grænertum, grænkáli og myntu Salsa Verde

 

Fyrir 4

SALSA VERDE

½ búnt steinselja, söxuð
6-7 mintulauf, söxuð
1-2 stk. ansjósur
1 msk. kapers
1 stk. hvítlauksrif, fínt saxað
2-3 msk. sítrónusafi
Salt og pipar

Aðferð:
Blandið öllu saman í matvinnsluvél og gerið miðlungsfínt mauk úr blöndunni. Smakkið til með salti og pipar.

 

RISOTTO

400 g risotto Arborio hrísgrjón
4 skalotlaukar, fínt saxaðir
4 hvítlauksrif, fínt söxuð
1 lárviðarlauf
2 dl hvítvín
2 l grænmetissoð
100 g parmesan ostur, rifinn
100 g smjör í bitum
2 msk. mascarpone ostur
200 g frosnar grænertur
1 búnt ferskt grænkál, fínt rifið og forsoðið

Aðferð:

Svitið skalotlauk og hvítlauk í ólífuolíu við miðlungshita í góðum, víðum potti. Bætið fljótlega við Arborio hrísgrjónum og blandið vel saman. Steikið í 1-2 mínútur. Bætið við hvítvíni og blandið vel saman við hrísgrjónin, lækkið hitann e.t.v. aðeins og eldið á vægum hita. Hvítvínið á að gufa alveg upp og þegar grjónin eru aftur þurr, bætið við 1-2 ausum af grænmetissoði og hrærið. Við risotto-gerð bætið þið smám saman vökva (grænmetissoði) við grjónin, hrærið saman og bætið við eftir þörfum. Aftur og aftur. Grjónin eru tilbúin eftir u.þ.b. 15-20 mínútur.

Þegar grjónin hafa ennþá smá bit bætið þið saman við þau grænertum, grænkáli og mascarpone osti og blandið vel. Bætið síðan út í rifnum parmesan osti og smjörbitum, þeytið vel saman með sleif. Smakkið til með salti og pipar. Stillið af þykktina með grænmetissoðinu, risotto á að leka aðeins niður þegar því er skammtað á diska og hafa kremaða áferð.

 

 

HÖRPUSKEL

400 g hörpuskel
80-100 g Extra Virgin ólífuolía

Aðferð:

Steikið hörpuskelina á mjög heitri pönnu í u.þ.b. 2-3 mínútur í ólífuolíu og smjöri.

Skiptið risotto á 4 diska eða í skálar og raðið hörpuskelinni ofan á ásamt steikarsafanum af pönnunni. Dreypið Salsa Verde dressingunni yfir, ásamt dálitlu af salti, pipar og kryddjurtum. Berið fram með góðu brauði.

 

Uppskriftin kemur frá veitingastaðnum Essensia.

 

Bjór og matur