Lakkríshjúpaður þorskhnakki

- með white ale smjörsósu, sætkartöflumús og ananassalsa

Þorskhnakkar

  • 800 g þorskhnakkar
  • 25 g lakkríssalt
  • 1 poki gamaldags lakkrís
  • 100 g smjör


Lakkríssalti stráð yfir þorskinn og kælt í 1 klst. Hnakkarnir útvatnaðir og þerraðir. Lakkrís settur í pott og vatni bætt við svo fljóti yfir, bræddur og látinn kólna. Hnakkarnir skornir í 200 g steikur og hjúpaðir með lakkríssósunni. 

Olía sett á vel heita pönnu um leið og fiskurinn ásamt smjörklípu. Fiskurinn steiktur í um 1 mín. á hvorri hlið og svo bakaður í ofni við 180°C í um 2 mín.


Sætkartöflumús

  • 1 stór sætkartafla
  • 200 ml rjómi
  • 100 g smjör
  • Salt og pipar
  • Safi úr ½ appelsínu

Sætkartaflan bökuð í ofni á 180°C í um 45 mín og svo afhýdd. Rjómi hitaður að suðu, kartöflunni bætt út í ásamt smjöri, salti, pipar og appelsínusafa. Allt stappað vel
saman eða sett í blandara. 

White ale smjörsósa

  • 33 cl white ale bjór
  • 250 ml rjómi
  • 1 sveppakraftsteningur
  • 1 appelsína
  • 200 g smjör við stofuhita

Rjóminn soðinn niður uns hann þykknar eða um ¾. White ale, sveppakrafti, appelsínuberki og safa bætt í. Látið sjóða þar til þykknar á ný. Mjúkt smjörið pískað saman við í smáum skömmtum.

Ananassalsa

  • ½ ananas
  • Srirachasósa eftir smekk
  • 50 ml ananassafi
  • 100 g spínat

Ananas skorinn í litla teninga, sriracha og ananassafa hrært saman við ásamt spínati.

Hentar með hveitibjór

Hveitibjórar eru oft með afgerandi sítrustónum í bland við aðra ávaxtatóna eða krydd og henta því vel með þessum rétti. Léttastur er hinn belgíski „witbier“, en meiri kraftur í þýskum „weizenbier“.

Uppskriftin er frá Frederiksen Ale House - úr bæklingnum Bjór og matur 2015 (PDF)