Grillaður skötuselur með kremuðu svartkáli og ferskum aspas

Fyrir 4 

  • 800 g hreinsaður skötuselur, skorinn í 200 g steikur 
  • 400 g svartkál, hreinsað af stilk og grófsaxað
  • 200 ml rjómi 
  • Salt og pipar 
  • 1 stk. sítróna
  • 4 hvítlauksgeirar, fínsaxaðir 
  • Ólífuolía 
  • 50 g smjör 
  • Balsamedik eftir smekk
  • 12 stk. ferskur grænn aspas 

Aðferð:
Steikið svartkálið, ásamt hvítlauk, í smjörinu á pönnu í 2-3 mín. Hellið rjómanum yfir og sjóðið í 5-8 mín. eða þangað til að rjóminn þykknar. Kryddið með safa úr ½ sítrónu, salti og pipar. Grillið skötuselinn á vel heitu grilli í u.þ.b. 2-3 mín. á hvorri hlið, látið hann síðan vera á lágum hita á efri grindinni í u.þ.b. 3 mín. , kreistið sítrónu yfir hann, kryddið með salti og pipar. Grillið aspasinn á meðan í 2-3 mín., setjið til hliðar og kryddið með salti og pipar, örlitlum sítrónusafa og ólífuolíu. Athugið hvort fiskurinn sé fulleldaður, setjið hann svo á miðjan disk, kremaða svartkálið yfir og aspasinn efst, dreypið ólífuolíu yfir og berið fram. 

 

Þessi uppskrift var sett inn í tilefni rósavínsþema í Vínbúðunum. Rétturinn hentar vel með ósætu rósavíni. Einnig er hægt að finna sína eigin samsetningu í vöruleitinni.
 

Uppskriftin er frá:
 


Leifur Kolbeinsson, matreiðslumaður og höfundur uppskriftar