Byggottó með heimalöguðu pestó og kirsuberjatómötum

Hentar fyrir 4 sem forréttur eða fyrir 2 sem aðalréttur

Byggottó
1 bolli íslenskt bankabygg
Parmesanbörkur (stökki endinn á parmesanostinum)
2 sellerístönglar 
1 gulrót
1 laukur
Lárviðarlauf
3 bollar vatn

Aðferð:
Risotto-leiðin felst í að búa til soð úr vatni, parmesanberki, selleríi, gulrót og lárviðarlaufi. Sjóðið allt saman og látið krauma nokkra stund á lágum hita. Þegar soðið er tilbúið eru hráefnin sigtuð úr. Setjið allt byggið í pott með smá olíu. Byrjið að hita og bætið einni ausu af soðinu út í og látið vökvann sjóða niður. Hrærið oft og fylgist vel með. Endurtakið þetta þar til grjónin eru orðin mátulega elduð eftir u.þ.b. 20-30 mín.

Auðveldari leið er að sjóða 2 bolla af byggi á móti 3 bollum af vatni eins og hrísgrjón. Gott er að setja parmesanbörk með í pottinn en veiða hann upp úr í lokin.  

Pestó
125 g basil
2 msk. sítrónusafi
2 msk. graskersfræ, ristuð 
2 msk. sólblómafræ
50 g parmesanostur, rifinn 
200 ml ólífuolía
Salt og pipar 

Aðferð:
Setjið allt í blandara ásamt helmingnum af ólífuolíunni. Afganginum af olíunni er síðan bætt við hægt og rólega eftir þörfum. Hrærið pestóið saman við byggið. Smakkið til með ólífuolíu, sítrónusafa, salti og pipar eftir smekk. Berið fram með söxuðum, íslenskum kirsuberjatómötum og rifnum parmesanosti. 

 

Með þessum rétti passa léttir ferskir IPA bjórar einna best eða aðrir bjórar með afgerandi sítrustóna.