Sleppa valmynd og fara beint í meginmál

Verslunarmannahelgin

29.07.2015

Vikan fyrir verslunarmannahelgi er jafnan ein annasamasta vika ársins í Vínbúðunum. Í fyrra komu um 128 þúsund viðskiptavinir í Vínbúðirnar þessa viku og alls seldust um 724 þúsund lítrar af áfengi. Til samanburðar komu rúmlega 100 þúsund viðskiptavinir í Vínbúðirnar í síðustu viku, þ.e. vikuna 20. – 27. júlí, og þá seldust um 481 þúsund lítrar af áfengi.

Reynslan sýnir að flestir viðskiptavinir koma í Vínbúðina föstudaginn fyrir verslunarmannahelgi sem er jafnan einn annasamasti dagur ársins. Í fyrra komu 42 þúsund viðskiptavinir þann dag. Flestir viðskiptavinir koma á milli kl. 16 og 18, eða allt að 7 þúsund viðskiptavinir á klukkustund. Þar sem álagið er mest er algengt að grípa þurfi til þess ráðs að hleypa viðskiptavinum inn í hollum. Fyrir þá sem vilja forðast langar biðraðir er gott að skipuleggja innkaupin vel og vera tímanlega.
 
Verslunarmannahelgin

Flest bendir til þess að viðskiptavinafjöldi fyrir verslunarmannahelgi í ár verði svipaður og í fyrra. Undirbúningur er nú í fullum gangi þannig að hægt verði að taka vel á móti viðskiptavinum.

Í Vínbúðunum er opið samkvæmt venju um verslunarmannahelgina á föstudegi og laugardegi en lokað sunnudag og mánudag (frídag verslunarmanna).