Þessi hvíta þrúga er sú þekktasta í Austurríki og þótt hún sé varla fær um að gefa af sér hágæðavín eru þau nánast ætíð góð og jafnframt gefur hún af sér það mikið magn að bændur eru hæstánægðir með ræktunina. Dæmigert vín úr Grüner Veltliner er daufgrænt með nokkuð hátt sýrumagn og hefur kryddaðan ilm, sem minnir á þurr vín frá Elsass. Þau innihalda oft dálitla kolsýru sem gerir þau sérlega frískandi þegar þau eru drukkin ung. Eitthvað af henni er ræktað í Ungverjalandi og Slóveníu en nánast ekkert utan Evrópu. Vín úr þessari þrúgu eru best ung og geymast frekar illa.