Í dag opnar Vínbúðin á Seyðisfirði í nýju og stærra húsnæði að Hafnargötu 4a.  ÁTVR festi kaup á húsinu í vor en þar var áður lögreglustöð bæjarins til húsa.  Mikið hagræði er í breytingunni fyrir viðskiptavini því nú verður verslunin í sjálfsafgreiðsluformi en fram að til þessa hefur verið afgreitt yfir borð.  ÁTVR á sér langa sögu á Seyðisfirði því þar hefur verið rekin áfengisverslun allt frá stofnun ÁTVR árið 1922.  Um áratuga skeið var Vínbúðin í húsnæði við Hafnargötu 11. Það húsnæði er í niðurníðslu en ríkt hefur óvissa um örlög  hússins.  Nú er unnið að því í samstarfi við heimamenn að finna framtíðarlausn á því máli og vonandi tekst að ljúka því máli sem fyrst.  

Opnunartími Vínbúðarinnar verður lengdur en nú verður opið á föstudögum frá klukkan 14 – 18 en mánudaga til fimmtudaga verður áfram opið frá 17 – 18.  

Auk Vínbúðarinnar á Seyðisfirði eru reknar Vínbúðir á Þórshöfn, Vopnafirði, Egilsstöðum, Neskaupsstað, Reyðarfirði, Fáskrúðsfirði, Djúpavogi og á Höfn.  Þessar Vínbúðir tilheyra sameiginlegri svæðisumsjón verslunarstjórans á Seyðisfirði,  Brynjars Júlíussonar.